Bədii Gimnastika üzrə 37-ci Dünya Çempionatı

Yayın son günləri gimnastika dünyasının diqqəti bir daha Azərbaycan paytaxtı Bakıya cəmlənəcək. Belə ki, 14 ildən sonra ölkəmiz yenidən ən önəmli yarışlarından biri - Bədii Gimnastika üzrə Dünya Çempionatına ev sahibliyi edəcək.   

16-22 sentyabr tarixlərində keçiriləcək yarış yalnız bütün dünyadan olan bədii gimnastların birincilik uğrunda mübarizəsi ilə deyil, eyni zamanda 2020-ci ildə Tokioda (Yaponiya)  təşkil ediləcək 32-ci  Olimpiya Oyunlarına lisenziya xarakteri daşıması ilə əlamətdar olacaq.

61 ölkənin iştirak edəcəyi çempionatda həm fərdi gimnastlar, həm də qrup hərəkətləri komandaları 7 gün boyunca baş tutacaq ayrı-ayrı alətlər və çoxnövçülük yarışlarında ən yaxşıların sırasında olmağa çalışacaqlar. Eyni zamanda komanda hesabında ən güclülərin adları açıqlanacaq.

İlkin qeydiyyat siyahısına əsasən yarışda çıxış edəcək 300-dən çox gimnast Olimpiadaya yeni namizəd olmaq üçün bütün güclərini toplayaraq yarışacaqlar. Belə ki, fərdi proqramda çoxnövçülük üzrə ilk 16-lıqda yer alan gimnastlar (bir ölkədən maksimum 2 gimnast olmaqla) lisenziya əldə etmiş olacaqlar. Qrup hərəkətləri komandalarına gəldikdə isə, ötən ilin Dünya Çempionatının nəticələrinə əsasən Bolqarıstan, Rusiya və İtaliya artıq lisenziyanı təmin edib. Bu ilin çempionatında çoxnövçülük xalları üzrə daha 5 ən yaxşı komanda Tokioya vəsiqə qazanacaq.

“Nağıllar gerçəkləşək” (“Fairy Tales will come to life”) devizi altında təşkil edilən çempionatın ən yadda qalan hissələrindən biri isə möhtəşəm açılış mərasimi olacaqdır. Təşkilatçılar bu dəfə də rəngarəng, bənzərsiz və izləyənləri nağıllar aləminə səyahətə aparacaq bir şou vəd edirlər. Mərasimdə Şərq motivləri əsasında səhnələşdirilmiş “Şərq nağılı” adlı şou ilə yanaşı, Azərbaycanın məşhur ifaçılarının iştirakı da təsdiq olunmuşdur. 

Belə ki, çempionatın məhz ilk günü – Açılış mərasimində ölkəmizlə yanaşı, digər ölkələrdə də məşhur olan Azərbaycanın xalq artisti, hit mahnıların ifaçısı Emin Ağalarov öz sevilən nəğmələri ilə izləyənləri sevindirəcək. Tanınmış Azərbaycan müğənnisi və bəstəkarı, əməkdar artist Tünzalə Ağayeva isə Azərbaycanın dövlət himnini a kapella şəklində ifa edəcək.

Açılış mərasiminin maraqlı məqamları bununla bitmir. Belə ki, mərasimdə Dünya Çempionatının ulduz səfiri Azərbaycanın sevilən müğənnisi, əməkdar artist Miri Yusif məhz bu yarış üçün xüsusi yazılmış mahnını səsləndirəcək.

Dünya Çempionatının səfiri çoxqat dünya çempionu, Olimpiya Oyunları mükafatçısı, məşhur keçmiş rusiyalı gimnast Yana Batırşina da yarışları tamaşaçılarla birlikdə izləyəcək. 

Bu çempionat zamanı Azərbaycan Gimnastika Federasiyasının rəsmi talismanı, hər kəsin sevimlisi “Qur-Qur” da sizinlə olacaq. Dünya səyahətindən Bakıya yenicə qayıtmış “Qur-Qur” sizinlə öz təəssüratlarını bölüşəcək.    

Bundan başqa, yarış boyunca tamaşaçıları maraqlı müsabiqələr və əyləncəli anlar gözləyir.

Odur ki, belə əhəmiyyətli yarışda gimnastlarımıza dəstək olmaq və maraqlı anlar yaşamaq üçün biletlərinizi elə indi əldə edin. Yarışın biletlərini Arenanın kassasından, Gənclik Mall alış-veriş mərkəzindən, həmçinin onlayn (https://ticketing.mga.az/) almaq mümkündür​. Qiymətlər isə 10, 15 və 20 manat təşkil edir.

Yarışlar haqqında ən son məlumatları isə rəsmi saytımızdan (www.agf.az) əldə bilərsiniz.

Məkan: Milli Gimnastika Arenası

Telefon: (+994 12/51) 566-96-99

Ünvan: Bakı, H.Əliyev pr., 178

Keçid: “Koroğlu” metro stansiyası

Xanımlar və cənablar!

Əziz dostlar və həmkarlar!

Bədii gimnastika üzrə 37-ci Dünya Çempionatının iştirakçıları və qonaqlarını ürəkdən salamlayıram. Beynəlxalq Gimnastika Federasiyasına (FIG) göstərdiyi etimada görə dərin minnətdarlığımı bildirirəm. Belə nüfuzlu yarışlara ev sahibliyi etmək bizim üçün böyük şərəf və böyük məsuliyyətdir.

İlk dəfə deyil ki, Bakı öz qapılarını mötəbər idman yarışları iştirakçılarının üzünə açır. Uzun müddətdir ki, Azərbaycan regionun qeyri-rəsmi idman paytaxtı titulunu qazanıb. Ölkəmizdə müxtəlif idman növləri üzrə Avropa və Dünya Çempionatları keçirilib, 2015-ci ildə Azərbaycan İlk Avropa Oyunlarına ev sahibliyi edib. 2005-ci ildə isə Bakıda ilk dəfə bədii gimnastika üzrə Dünya Çempionatı keçirilib.

O zaman müstəqilliyini yenicə bərpa etmiş Azərbaycanda gimnastikanın dinamik inkişafı yeni başlayırdı və gimnastika məktəbinin indiki nailiyyətləri üçün təməl qoyulurdu. Bu gün ölkəmizdə müasir gimnastikanın bir çox növləri uğurla inkişaf etdirilir. İdmançılarımız ən nüfuzlu beynəlxalq yarışların fəxri kürsülərinə yüksəlirlər. Gimnastika bölmələri Bakı və Azərbaycanın bölgələrində populyardır. Bu gözəl və ahəngdar idman növü həqiqətən də ölkəmizdə kütləvi və çox seviləndir. İdman infrastrukturasında da Azərbaycanda böyük inkişaf müşahidə olunur. Azərbaycanın Milli Gimnastika Arenası müntəzəm olaraq, gimnastikanın olimpiya növləri üzrə nüfuzlu beynəlxalq yarışlara ev sahibliyi edir. Bir çox ölkələrin idmançıları buraya təlim-məşq toplanışlarına gəlirlər. Təsadüfi deyil ki, Azərbaycanın gimnastika məktəbi beynəlxalq idman ictimaiyyəti tərəfindən də tanınır.

İndi isə biz - böyük və mehriban ümumdünya gimnastika komandasının üzvləri qonaqpərvər Azərbaycan torpağında yenidən görüşəcəyik. Dünya Çempionatının bütün iştirakçılarına uğurlar, qələbələr və şəxsi rekordlar arzulayıram. Əminəm ki, idman həvəskarları gözəl və yadda qalan çıxışların şahidi olacaqlar. Dünya Çempionatının təşkilində iştirak edən hər kəsə - Beynəlxalq Gimnastika Federasiyasının rəhbərliyinə, Təşkilat Komitəsinin bütün üzvlərinə, idmançılara və azarkeşlərə dərin minnətdarlığımı bildirirəm. Əminəm ki, Siz, əziz iştirakçılar və çempionatın qonaqları, bizim Bakının necə gözəl bir şəhər olduğunu görəcək və Azərbaycan xalqının səmimiliyi və isti münasibətini hiss edəcəksiniz. Bir daha sizə can sağlığı, sülh və əmin-amanlıq arzulayıram!

Mehriban Əliyeva

Azərbaycan Gimnastika Federasiyasının Prezidenti